الاغلاق الشامل وجولة في المخيم 

29 نوفمبر 2020 - 19:18
بقلم / محمد الخراز
صوت فتح الإخباري:


 

الحديث منذ ايام عن الاغلاق الشامل دفعني بصفتي امين سر لجنة اللاجئين بحركة فتح بمحافظة رفح  للقيام بجولة داخل مخيم الشابورة لسماع  اللاجئين اهالي المخيم وما ان وصلت كانت اول مقابلة مع امرأة في الستينات من عمرها جالسة على باب منزلها

انا / خالتي شو رأيك في موضوع الاغلاق الشامل 

هي / انا يا خالتي ايام منع التجول والحرب ما قعدت في الدار لو يعملو مليون اغلاق حطلع واقعد عالباب

اما الثاني فهو بائع سجائر متزوج ولديه اربعة اطفال 

انا / شو رأيك في الاغلاق الشامل 

بائع السجائر / انا بعمل كل يوم من 15 ل 20 شيكل والحمد لله بيكفن فطور وغذا وعشا ومصروف الاولاد يعني عايش يوم بيوم بدهم يعملو اغلاق شامل احنا معهم وخطوة ممتازة  بس يوفرولنا اكل وشرب للصغار من وين بدنا نطعميهم 

خلال حديثي مع بائع السجائر توقف سائق فما ان سمعنا نتحدث عن الاغلاق حتى قال بنبرة ذل وانكسار 

السائق / يا ابو الشباب انا متزوج وعندي 3 اطفال وامي وابوي واخ واخت انا بعيلهم وبشتغل على السيارة شغل من الصبح لاخر اليوم يا دوب اطلع 30 شيكل الي و 70 شيكل للسيارة وصاحبها وبنقول الحمد لله ابوي مريض وبحتاج متابعة عند دكتور خاص واختي في الجامعة ولازمها مصاريف ورسوم وربنا وحده عالم في الحال وقديش بعاني وانا بعمل ال 30 شيكل فما بالك لو راحن هن كمان صدقني مش بنموت من الجوع وبس وكمان انا بموت حسرة لاني بطلت قادر اقف جنب ابوي المريض واختي الجامعية بدهم يغلقوا عشان مصلحتنا عارفين بس من وين بدنا نوكل ونوفر العلاج ومتطلبات البيت ودواء الحج خليها على الله يا راجل 

توقفت عن التجول بعد كمية المعاناة التي سمعتها باختصار الاغلاق الشامل مطلوب وضروري بعد تفشي فايروس كورونا وزيادة اعداد الحالات بشكل كبير ولكن الاهم تأمين منازل الاسر المتعففة ومن يعملون بالمياومة مطلوب من الحكومة وذوات الشأن الوقوف بجانبهم دون تمييز ومطلوب من الجميع التكافل في حال الاغلاق الشامل فهل نقبل ان يقال جاع  فلسطيني في غزة العزة والمحبة والاخوة جاع فلسطيني في غزة التي صمدت امام الحروب والحصار ولم تنحني ... ستبقى غزة صامدة ورافعة رأسها رغم كل ما مرت وستمر به ... ونعدكم في تيار الاصلاح الديمقراطي ان نقف مع اهلنا بكل ما نستطيع ونبذل قصارى جهدنا للتخفيف عن اهالي قطاع غزة في حال الاغلاق الشامل فالقائد محمد دحلان كان وسيبقى الابن البار لغزة واهلها وخير عون وسند لهم في كل الظروف

كن أول من يعلق
تعليق جديد
البريد الالكتروني لا يظهر بالتعليق